Yekaterinburqda Azərbaycan diasporunun keçmiş rəhbərinin məhkəməsi başlayıb

Yekaterinburqda Azərbaycan diasporunun keçmiş rəhbəri Şahin Şıxlinski, onun oğlu Mutvalı, Səfərov qardaşları və Şücayəddin Rəcəbovun məhkəmə iclası keçirilir.

presstvaz-ın xəbərinə görə, bu barədə Ura.ru məlumat verib.

Sverdlovsk vilayət məhkəməsində baş tutan iclasda zərərçəkmiş Fehruz Şirinov və prokurorluq vəsatətlə çıxıb ediblər. Onlar iclasın KİV üçün qapalı keçirilməsini istəyiblər. Şirinov təqsirləndirilən şəxslərdən ona təhdidlərin gəldiyini iddia edir.

Dövlət ittihamçısı bildirib ki, Şirinov təqsirləndirilən şəxslərdən təhdidlər alır. Şirinov məhkəmədə bunu təsdiqləyib.

“Mən hər gün təhdidlər alıram. Hətta vəkillər tərəfindən də təhdidlər olub”, – deyə Şirinov iddia edib.

Təqsirləndirilən şəxslərin müdafiəsi onun mövqeyinə etiraz edib.

“Prokurorluq tərəfindən hazırda Şirinovun guya təhlükədə olduğunu göstərən şərait yaradılır. Amma bu belə deyil, onun iddialarının təsdiqi yoxdur”, – deyə vəkil Yekaterina Kuvaldina cavab verib.

Şirinovun təhdidlərdə ittiham etdiyi digər müdafiə vəkili onun iddialarını rədd edib. Lakin hakim Yuri Radçuk prokurorluğun vəsatətini təmin edib.

Xatırladaq ki, Şahin Şıxlinski 2025-ci ilin yayında həbs edilib. Müstəntiqlər onu F.Şirinova qarşı sui-qəsd cəhdində və 2001-ci ildə satıcı İkram Paşayevin qətlinin təşkilində şübhəli bilirlər.

F.Şirinov təsadüf nəticəsində sağ qalıb. On beş il sonra iş yenidən açılıb. Akif, Ayaz, Bəkir, Kamal, Məzahir Səfərovlar və Şücayəddin Rəcəbov da Ş.Şıxlinski ilə birlikdə mühakimə olunacaqlar. Onlar qəsdən adam öldürməyə cəhddə və həmvətənlərinin qətlində ittiham olunurlar.