“Gənclər Paytaxtı” seçilmiş Goranboyun rəsmi loqo və maskotu təqdim olunub

2026-cı il üçün Azərbaycanın “Gənclər Paytaxtı” seçilmiş Goranboy rayonunun rəsmi loqo və maskotu təqdim olunub.

presstvaz xəbər verir ki, loqonun əsas elementi olan “G” hərfi həm Goranboyu, həm də gəncliyi simvolizə edir. Loqonun yuxarı hissəsində yer alan alov Goranboy adının mənşəyinə “gor (qor)” (od, odlar yurdu) anlayışına istinad edir və enerji ilə dinamizmi ifadə edir.

Aşağı hissədəki çay və təbiət elementləri isə rayonun zəngin təbii irsini və davamlı inkişaf ideyasını əks etdirir. Bu elementlərin vəhdəti “G” hərfi daxilində gənc obrazının formalaşmasına imkan yaradır. 2026-cı ilin “Gənclər Paytaxtı”nın maskotu olaraq su elementini simvolizə edən obraz seçilib.

Bu seçim Goranboy rayonunun ərazisindən keçən çayların və ümumilikdə su ehtiyatlarının bölgənin təbii, sosial və mədəni həyatında mühüm rol oynaması ilə əlaqədardır. Su maskotu həyatın mənbəyini, təmizliyi, saflığı və davamlı inkişafı ifadə etməklə yanaşı, gəncliyin daim yenilənən, hərəkətdə olan və gələcəyə doğru inkişaf edən enerjisinin rəmzi kimi təqdim olunur.