Trampdan parasetamolla bağlı xəbərdarlıq: ABŞ-də həkimlər hamilələrə bu dərmanı yazmayacaqlar

“Hamiləlik zamanı parasetamol istifadəsi uşaqlarda autizm riskini artırır”.

presstvaz-ın TASS-a istinada verdiyi məlumata görə, ABŞ Prezidenti Donald Tramp Ağ Evdə çıxışı zamanı bu barədə bəyan edib.

Trampın sözlərinə görə, bundan sonra ABŞ Səhiyyə Nazirliyinin Qida və Dərman İdarəsi (FDA) vətəndaşları hamiləlik zamanı parasetamol (həmçinin “Tylenol” kimi tanınır) qəbulunun yarada biləcəyi təhlükələr barədə məlumatlandıracaq.

ABŞ lideri, həmçinin statistikaya istinad edərək bildirib ki, təxminən 20 il əvvəl ABŞ-də autizm yalnız hər 10 min uşaqdan birində müşahidə olunurdu, lakin son illər bu göstərici əhəmiyyətli dərəcədə artıb və indi xəstəlik hər 31-ci uşaqda qeydə alınır.

Tramp misal olaraq kənd yerlərində təcrid olunmuş şəkildə yaşayan amiş icmasını göstərib. Ağ Ev rəhbərinin əminliyinə görə, onlar parasetamoldan imtina etdikləri üçün autizm problemi ilə qarşılaşmırlar. Bundan əlavə, ABŞ prezidenti Kubada autizm xəstəliyinin aşağı səviyyədə olduğunu bildirib, çünki bu ölkədə “parasetamol almağa pul yoxdur”.

Amerika lideri vəd edib ki, ABŞ hakimiyyəti autizmə qarşı dərman tapacaq.

Xatırladaq ki, ABŞ Prezidenti bir gün əvvəl autizm probleminin cavabını tapdıqlarını və bu barədə rəsmi açıqlama verəcəyini elan edib.