Öz cinayətləri haqqında mahnılar bəstələyən məşhur reper həbs olundu

Böyük Britaniyada iri narkotik ticarət şəbəkəsinin liderlərindən biri hesab edilən mançesterli reper Klint Kertis narkotik və silah saxlamaq maddəsi ilə 19 il azadlıqdan məhrum edilmə cəzasına məhkum edilib. Musiqiçi və onun cinayət yoldaşları sosial şəbəkələr vasitəsilə kriminal həyat tərzini fəal şəkildə təbliğ ediblər. Bu isə nəticədə istintaqa onların əleyhinə sübutlar toplamağa kömək edib.

presstvaz bu barədə “Daily Mail”ə istinadla xəbər verir.

Məlumata görə, 29 yaşlı Kertis internetdə kapüşonlu silahdaşlarının əhatəsində lüks zinət əşyaları və bahalı geyimlərlə öyündüyü vəziyyətdə videokliplər paylaşıb, eyni zamanda öz treklərində cinayətkar fəaliyyətinə işarə edib.

Epizodlardan birində reper sıyıq hazırlayır və prosesi narkotik istehsalına eyham vuran misralarla müşayiət edir.

Başqa bir videoda isə o, “Mercedes G-Wagon” avtomobilinin polis tərəfindən axtarış anını çəkib.

Qruplaşmanın üzvlərinin həbsləri mərhələli şəkildə baş verib. Kertis Ardvikdə həbs edilib, əmisi oğlu Devid çardaqda gizlənməyə cəhd etdikdən sonra tutulub, Cerom Uilyams isə hakimiyyətə təslim olmadan əvvəl iki həftə qaçaq düşüb. Ümumilikdə, işdə 10 nəfərdən çox adam iştirak edib.

Kertisin cinayət yoldaşları 5 ildən 12 ilə qədər həbs cəzası alıblar.