Baş Dövlət Yol Polisi İdarəsinin əlverişsiz hava şəraiti ilə bağlı müraciəti

Sürücü və piyadalardan ehtiyatlı davranmaları xahiş olunur

Milli Hidrometeorologiya Xidmətindən verilən məlumata görə, fevralın 10-dan başlayaraq ölkə ərazisində havanın küləkli olacağı, fasilələrlə sulu qar və qar yağacağı, dağlıq və dağətəyi rayonlarda isə yolların buz bağlayacağı gözlənilir.

Daxili İşlər Nazirliyinin Mətbuat Xidmətindən  “Presstv”az-a verilən məlumata görə,  Baş Dövlət Yol Polisi İdarəsi qeyri-sabit hava şəraiti ilə əlaqədar yol hərəkəti iştirakçılarına müraciət edərək sürücüləri daha diqqətli və məsuliyyətli olmağa çağırır. Küləkli hava şəraiti ilə əlaqədar nəqliyyat vasitələrinin aşma, qopma və sürüşmə ehtimalı olan obyektlərin altında saxlanılmaması tövsiyə olunur. Xüsusilə qoşqulu, tentli və uzun ölçülü yük avtomobillərinin iştirakı ilə baş verə biləcək yol-nəqliyyat hadisələrinin qarşısının alınması üçün qabaqlayıcı tədbirlərin görülməsi vacib hesab edilir.

Qarın yağması nəticəsində yol örtüyünün sürüşkən olacağı nəzərə alınaraq, sürücülərdən xüsusilə dağlıq ərazilərdə qış mövsümünə uyğun olmayan şinlərlə təchiz edilmiş avtomobillərdən istifadə etməmək, nəqliyyat vasitələrinin texniki sazlığına əvvəlcədən əmin olmaq, həmçinin sürət həddini mövcud meteoroloji şəraitə uyğun seçmək xahiş olunur.

Eyni zamanda, əlverişsiz hava şəraitinin piyadaların hərəkətində də çətinliklər yaradacağını nəzərə alaraq, piyadalar təhlükəsizlik baxımından daha məsuliyyətli davranmağa, özlərinin və digər yol hərəkəti iştirakçılarının həyat və sağlamlığına təhlükə yarada biləcək hərəkətlərdən çəkinməyə çağırılır.

presstvaz    – Azərbaycanın etibarlı informasiya mənbəyi