İrandakı partlayışın səbəbi bilindi – FOTO

İranın cənubundakı Bəndər-Abbas liman şəhərində baş verən güclü partlayış ABŞ və İran arasında gərginliyin artdığı bir vaxta təsadüf edib.

presstvaz xəbər verir ki, dövlət mediası hadisəyə səbəb kimi qaz sızmasını göstərir.

İranın "Tasnim" xəbər agentliyinin məlumatına görə, şənbə günü baş verən hadisədə ən azı 1 nəfər həlak olub, 14 nəfər isə yaralanıb. Partlayış şəhərin Müəllim bulvarı ərazisindəki səkkizmərtəbəli yaşayış binasında qeydə alınıb. Dövlət televiziyası partlayışın iki mərtəbəni tamamilə dağıtdığını, ətrafdakı mağazalara və bir neçə avtomobilə ciddi ziyan vurduğunu bildirib.

Yerli yanğından mühafizə idarəsinin rəisinə istinadən "Mehr" agentliyi qeyd edib ki, Fars körfəzi sahilindəki bu binada partlayışa qaz sızması səbəb olub. Hörmüzqan vilayətinin böhran idarəetmə direktoru Mehrdad Həsənzadə isə hadisə ilə bağlı araşdırmaların hələ də davam etdiyini vurğulayıb.

İnternetdə yayılan şayiələrdən sonra İslam İnqilabı Keşikçiləri Korpusu (SEPAH) bəyanat yayaraq bildirib ki, bölgədə onlara məxsus heç bir hərbi dəniz obyekti hədəf alınmayıb. Eyni zamanda, İraq sərhədi yaxınlığındakı Əhvaz şəhərində də qaz partlayışı nəticəsində 4 nəfərin öldüyü xəbər verilib. İsrailli rəsmilər "Reuters" agentliyinə açıqlamalarında şənbə günü baş verən bu hadisələrdə İsrailin heç bir əlaqəsinin olmadığını bildiriblər.

Bu hadisələr Vaşinqton və Tehran arasında münasibətlərin olduqca həssas olduğu bir dönəmdə baş verib. Belə ki, ABŞ bölgəyə aviadaşıyıcı qrupunu göndərib. Ötən çərşənbə günü prezident Donald Tramp İrana qarşı yenidən xəbərdarlıq edərək, Tehranı nüvə proqramı ilə bağlı saziş bağlamağa çağırmışdı.