Xəzər rayonunda özünü qaz idarəsinin əməkdaşı kimi təqdim edən şəxs saxlanılıb

DİN: Qanunsuz saxlanılan silah-sursat aşkar edilərək götürülüb

       Daxili İşlər Nazirliyinin rəsmi mənbələrindən presstvaz-a daxil olan məlumata əsasən, nazirliyin əməkdaşları tərəfindən qanunsuz saxlanılan odlu silah-sursatın aşkar edilərək götürülməsi istiqamətində əməliyyat və profilaktik tədbirlər davam etdirilir.

Yanvarın 23-də polis əməkdaşları paytaxt və respublikanın ayrı-ayrı rayonlarında 6 avtomat silahı, 1 tapança, 25 tüfəng, 5 patron darağı və 427 ədəd müxtəlif çaplı patron aşkar edərək götürüblər.

       Eyni zamanda Xəzər rayonunda özünü qaz idarəsinin əməkdaşı kimi təqdim edərək vətəndaşları aldadan şəxs saxlanılıb. Belə ki, naməlum şəxsin evləri gəzərək qaz sayğacının guya qüsurla işləməsini əsas gətirməklə onun dəyişdirilməsi adı altında vətəndaşlardan pul aldığı barədə polisə məlumat daxil olub.

Xəzər Rayon Polis İdarəsinin əməkdaşları tərəfindən həyata keçirilən tədbirlərlə qeyd edilən dələduzluq əməllərini törətməkdə şübhəli bilinən Ağayev Yusif Mərdan oğlu müəyyən edilərək saxlanılıb. Onun törətdiyi əməllərlə bağlı araşdırma aparılır.

       Polis əməkdaşları bildirir ki, Y.Ağayevin qanunsuz əməllərindən zərərçəkən digər vətəndaşlar varsa, bu barədə hüquq-mühafizə orqanlarına müraciət edə bilərlər.

presstvaz   – Azərbaycanın etibarlı informasiya mənbəyi