Eyni əməl, eyni sürücü: Yenidən narkotik təsiri altında sükan arxasında

Yol polisi sərt tədbir gördü

       Daxili İşlər Nazirliyinin rəsmi mənbələrindən presstvaz-a daxil olan məlumata əsasən, paytaxt sakini Elyar Veyisov idarə etdiyi “Toyota” markalı avtomobillə yol hərəkəti qaydalarını pozduğu üçün Ekoloji Nəzarət üzrə YPX Bölüyünün əməkdaşları tərəfindən saxlanılıb.

Sənədlərin yoxlanılması zamanı sürücünün qeyri-adekvat hərəkətləri polis əməkdaşlarında şübhə yaradıb. Araşdırma zamanı məlum olub ki, E.Veyisov altı ay əvvəl də narkotik sərxoşluğu vəziyyətində avtomobil idarə etdiyinə görə məsuliyyətə cəlb edilib.

         Növbəti dəfə tibbi müayinədən keçirilən sürücü yenidən narkotik maddə qəbul etdiyini etiraf edib. Eyni qanunazidd əməli təkrar törətdiyinə görə məhkəmənin qərarı ilə Elyar Veyisov 2 il müddətinə sürücülük hüququndan məhrum edilib və 15 gün inzibati qaydada həbs olunub.

Baş Dövlət Yol Polisi İdarəsi narkotik vasitələrin təsiri altında sükan arxasına əyləşərək digər hərəkət iştirakçılarının həyatına təhlükə yaradan şəxslərə qarşı mübarizənin davam etdiriləcəyini bildirir və bu kimi hallara qarşı bundan sonra da ən sərt tədbirlərin görüləcəyini vurğulayır.

presstvaz   – Azərbaycanın etibarlı informasiya mənbəyi