Yol hərəkəti qaydalarını kobud şəkildə pozan sürücüyə sərt tədbir görüldü

Xankəndidə avtoxuliqanlıq edən şəxs həbs edilib

     Daxili İşlər Nazirliyinin rəsmi mənbələrindən  presstvaz-a daxil olan məlumata əsasən, Xankəndi şəhərində ictimai asayişi nümayişkaranə şəkildə pozan və vətəndaşların haqlı narazılığına səbəb olan sürücü polis əməkdaşları tərəfindən saxlanılıb.

DİN Mətbuat Xidmətinin regional qrupundan bildirilib ki, şəhər ərazisində fərdi əməklə məşğul olan 40 yaşlı Elnur Süleymanov qarlı hava şəraitində idarə etdiyi “Chevrolet Camaro” markalı avtomobillə yol hərəkəti qaydalarını kobud şəkildə pozaraq təhlükəli manevrlər edib və avtoxuliqanlıq hərəkətlərinə yol verib.

     Faktla bağlı E.Süleymanov barəsində polis əməkdaşları tərəfindən inzibati protokol tərtib olunaraq baxılması üçün məhkəməyə göndərilib. Məhkəmənin qərarı ilə sürücü 1 il müddətinə nəqliyyat vasitəsini idarəetmə hüququndan məhrum edilib və 15 sutka inzibati qaydada həbs olunub.

Daxili İşlər Nazirliyi bir daha yol hərəkəti iştirakçılarını qaydalara ciddi əməl etməyə, ictimai təhlükəsizliyi təhdid edən hərəkətlərdən çəkinməyə çağırır.

presstvaz  – Azərbaycanın etibarlı informasiya mənbəyi