Argentinanın “Boka Xuniors” klubunun baş məşqçisi ölüb

Argentinanın “Boka Xuniors” futbol klubunun baş məşqçisi Migel Anxel Russo 69 yaşında vəfat edib.

presstvaz-ın xəbərinə görə, bu barədə klubun “X” hesabında məlumat verilib.

“Migel Anxel Russonun vəfatını “Boka Xuniors” dərin hüznlə elan edir. Migel klubumuzda unudulmaz iz qoyub və əbədi olaraq sevinc, hərarət və zəhmətkeşlik nümunəsi olaraq qalacaq”, – deyə məlumatda bildirilib.

Argentina Futbol Assosiasiyası Russonun ölümü ilə bağlı başsağlığı verib.

Qeyd edək ki, baş məşqçi bir neçə ildir xərçənglə mübarizə aparırdı, oktyabrın 6-da isə klub onun evdə ağır vəziyyətdə və həkim nəzarəti altında olduğunu açıqlamışdı.

Russo sonuncu dəfə 2025-ci ilin iyununda “Boka Xuniors”un baş məşqçisi təyin edilib. O, daha əvvəl 2007-ci və 2019-2021-ci illərdə də bu vəzifədə çalışıb. Onun rəhbərliyi altında klub Libertadores Kubokunu (2007), Argentina Futbol Çempionatını (2019-2020), Peşəkar Argentina Futbol Liqası Kubokunu (2020) və Argentina Futbol Kubokunu (2019-2020) qazanıb.