“Apple”ı Trampın ticarət müharibəsinə görə 900 milyon dollar zərər gözləyir

“Apple” şirkəti ABŞ Prezidenti Donald Trampın tətbiq etdiyi yeni ticarət tarifləri səbəbi ilə cari rübdə xərclərinin 900 milyon dollar artacağını gözləyir.

presstvaz-ın investing.com-a istinadla verdiyi məlumata görə, bu barədə şirkətin baş direktoru Tim Kuk gəlir hesabatı ilə bağlı telefon konfransında məlumat verib.

Onun sözlərinə görə, “iPhone” istehsalının Çindən Hindistana köçürülməsi artıq başlanıb.

Eyni zamanda, ABŞ-də satılan “iPad”, “Mac”, “Apple Watch” və “AirPods” modellərinin əsas istehsal yeri Vyetnam olacaq. Çin isə ABŞ-dən kənar bazarlara yönələn satışlar üçün əsas istehsal məkanı olaraq qalacaq.

Şirkət rəhbəri tariflərin mart rübündə məhdud təsir göstərdiyini bildirsə də, cari şərtlər dəyişməzsə, 900 milyon dollarlıq əlavə xərcin yaranacağını qeyd edib.

Xatırladaq ki, apreldə Tramp Çin mallarına 145%-lik tarif tətbiq edib və yaxın həftələrdə elektronika məhsulları üçün ayrıca tariflərin qüvvəyə minəcəyi gözlənilir. Bu qərarlar “Apple”ın istehsalının 90%-dən çoxunun Çində həyata keçirilməsi fonunda şirkət üçün ciddi problemlər yaradır.