Dueyn Conson həyatında iz qoymuş Havay mafiyası haqqında kitab yazacaq

“Moana” animasiya blokbasterinin ulduzu və Hollivudun gəliri ən çox olan aktyorlarından biri, “The Rock” (Qaya) ləqəbi ilə tanınan Dueyn Conson yeni iddialı layihəyə hazırlaşır.

presstvaz “Entertainment Weekly” nəşrinə istinadən xəbər verir ki, Conson 20-ci əsrin ortalarında “The Company” kriminal sindikatına başçılıq etmiş məşhur Havay mafiya başçısı Uilford “Nappy” Pulava haqqında kitab yazacaq.

Kitab üzərində işləmək üçün Dueyn həmmüəllif qismində çıxış edəcək təcrübəli jurnalist və yazıçı Nik Biltonu cəlb edib.

Conson və Biltonun kitabı Havaydakı mütəşəkkil cinayətkarlıq dünyası barədə bəhd edəcək. Dueyn Conson üçün bu hekayə həm də şəxsi əhəmiyyət daşıyır.

“Mənim öz ailəm həmin dövrün bir hissəsini yaşayıb və mən onun geridə qoyduğu izləri öz gözlərimlə görmüşəm… Bu hekayə Polineziya mədəniyyətimizə, əcdadlarımıza, vətənimizə hörmət barədə və cənnətdə həqiqətən baş verənlərin hekayəsini bölüşmək imkanı verəcək”, – deyə aktyor bildirib.

Maraqlıdır ki, Conson və Biltonun kitabı Martin Skorsezenin yeni film layihəsi ilə əlaqəlidir. Bu filmdə Dueyn Consonun özündən başqa, Leonardo Di Kaprio və Emili Blant kimi ulduzlar çəkiləcəklər. Bəlkə də, Conson özü Uilford Pulavanın rolunu oynayacaq. Belə ki, kitabın həmmüəllifi Nik Bilton gələcək filmin ssenarisi üzərində işləyir.