Cəlilabadın qazsız qalan 15 kəndi: Problem nə zaman həll olunacaq?

Cəlilabad rayonunun dağlıq hissəsində yerləşən 15 kəndin təbii qazla hələ də təmin olunmaması sakinləri narahat edən əsas məsələyə çevrilib.

presstvaz “Report”a istinadən xəbər verir ki, bu barədə yerli sakinlər məlumat veriblər.

Onların sözlərinə görə, Cəlilabadın rayon mərkəzindən 30-60 kilometr məsafədə yerləşən, əhalisinin ümumi sayı təqribən 10 min nəfər olan Buravar, Badamağac, Şatırlı, Əsədli, Ləkin, Musalı, Zəhmətabad, Kövüzbulaq, Edişə, Xanəgah, Türkelli, Çəmənli, Qaradağlı, Cəngan, Fərəcullalı kəndlərində təbii qazın olmaması səbəbindən əhali ciddi çətinliklərlə üzləşir.

Sakinlər bildiriblər ki, sadalanan kəndlərdə qaz olmadığı üçün onlar evlərini qızdırmaq üçün baha qiymətə odun almaq məcburiyyətində qalırlar. Bu səbəbdən, hər bir evdə qış mövsümündə orta hesabla 80 kubmetr odun yandırılır. Yay aylarında bir kubmetri 20 manata satılan odunun qiyməti qışda 25 manata qalxır. Nəticədə kənd sakinləri bir mövsümdə yalnız odun üçün 1 600 manata yaxın pul sərf etməli olurlar.

Bu vəsaiti ödəməyə çətinlik çəkən sakinlər deyirlər ki, həmin kəndlərə vəd olunduğu kimi, qaz çəkilsə, onların xərci xeyli azalar.

Azərbaycan Dövlət Neft Şirkətinin (SOCAR) “Azəriqaz” İstehsalat Birliyi İctimaiyyətlə əlaqələr şöbəsinin rəisi Eldəniz Vəliyev bildirib ki, qeyd edilən kəndlərin qazlaşdırılmasına “Azəriqaz”ın maliyyə imkanlarından asılı olaraq, növbəti mərhələlərdə baxıla bilər.