Van Dammın adı Rumıniyada insan alveri ilə bağlı cinayət işində hallandı

Belçikaəsilli ABŞ-li aktyor Jan-Klod Van Damm Rumıniyada yetkinlik yaşına çatmayanlar da daxil olmaqla, insan alveri üzrə kriminal şəbəkə ilə bağlı cinayət işində fiqurant olub.

presstvaz-ın xəbərinə görə, bu barədə “Hotnews” portalı məlumat verib.

“Cinayətlər Kannda həyata keçirilirdi, Van Dammın ittiham olunduğu əməl isə istismara məruz qaldığı məlum olan şəxsin cinsi xidmətlərindən istifadə etməsidir”, – deyə zərərçəkənlərdən birinin adından vəkil tərəfindən Rumıniya Mütəşəkkil Cinayətkarlıq və Terrorizmlə Mübarizə İdarəsinə (DIICOT) verilən bəyanatda bildirilir.

Hadisələrin təxminən 10 il əvvəl aktyorun Kannda olduğu vaxt baş verdiyi və orada fahişəliyə məcbur edilən rumınəsilli beş qızın xidmətlərindən istifadə etdiyi iddia edilir.

Qeyd olunur ki, Van Damm üçün qız seçimi ilə “EuroDemos” qeyri-kommersiya təşkilatının prezidenti və “Kasta Morrely” model agentliyinin sahibi, rumıniyalı sahibkar Morel Bolya məşğul olub. 2022-ci ildə o, yetkinlik yaşına çatmayanların alveri işində əsas müttəhimə çevrilib. İş materiallarında deyilirdi ki, 2000-2016-cı illərdə qızlar, o cümlədən yetkinlik yaşına çatmayanlar bu qeyri-kommersiya təşkilatı və model agentliyi vasitəsilə psixoloji məcburiyyətdən istifadə etməklə cinsi istismarla bağlı fəaliyyətlərə cəlb ediliblər. Hazırda iş üzrə istintaq davam edir.

DIICOT aktyorun adının hallandığı şikayətin verilməsi faktını təsdiqləyib və işin icraata qəbul edildiyini qeyd edib.