Tramp üçüncü dəfə prezidentliyə namizədliyini irəli sürmək imkanından danışdı

ABŞ Prezidenti Donald Tramp üçüncü dəfə namizədliyini irəli sürmək imkanını hələ ki ciddi şəkildə nəzərdən keçirməyib.

presstvaz-ın TASS-a istinadən xəbərinə görə, bu barədə o, Ağ Evin mətbuat korpusunun jurnalistləri ilə söhbəti zamanı danışıb.

“Mən bu məsələni heç vaxt araşdırmamışam. Deyirlər ki, bunu etməyin bir yolu var, amma mənim bundan xəbərim yoxdur”, – deyə o, məsələ ilə bağlı sualı cavablandırarkən bildirib.

Trampdan, həmçinin hipotetik yeni seçkiqabağı yarışda rəqibi Demokratlar Partiyasından ABŞ-nin 44-cü prezidenti Barak Obama olarsa, buna necə yanaşacağını soruşublar.

“Mən böyük məmnuniyyətlə istərdim. Bu yaxşı olardı. Bu mənim xoşuma gəlir”, – deyə Donald Tramp qeyd edib.

Xatırladaq ki, daha əvvəl ABŞ lideri “NBC News” telekanalına verdiyi şərhdə üçüncü müddətə yenidən prezident seçilmək imkanından danışarkən “zarafat etmədiyini” bildirib. Daha sonra jurnalistlərlə söhbətində belə bir ehtimalı müzakirə etmək istəmədiyini deyib.

“Sadəcə, onu nəzərə çatdırıram ki, getdikcə daha çox insan mənə “xahiş edirik, yenidən seçilin” deyir”, – deyə Tramp əlavə edib.