Astana AZAL-a məxsus təyyarə qəzasının tam araşdırılması üçün ICAO ilə əməkdaşlığı davam etdirəcək

Qazaxıstanın baş nazirinin müavini Kanat Bozumbayev Beynəlxalq Mülki Aviasiya Təşkilatının (ICAO) Avropa və Şimali Atlantika Bürosunun rəhbəri Nikolya Rallo ilə görüşüb. O, Azerbaijan Airlines (AZAL) aviaşirkətinə məxsus təyyarənin qəzaya uğraması ilə bağlı araşdırmada müstəqil ekspert Tormodur Tormodssonun hadisə yerinə vaxtında göndərilməsinə görə minnətdarlığını bildirib.

presstvaz bu barədə Qazaxıstan mediasına istinadən xəbər verib.

Bildirilir ki, Bozumbayev Qazaxıstan hökuməti adından ICAO-ya davamlı dəstəyə görə təşəkkür edib və qəzanın obyektiv araşdırılması üçün əməkdaşlığın davam etdiriləcəyini vurğulayıb.

Baş nazirin müavini əlavə edib ki, Qazaxıstan təyyarə qəzasının ilk günlərindən obyektiv və hərtərəfli araşdırma aparmağa hədəflənib.

Nikolya Rallo Qazaxıstanın AZAL təyyarəsinin qəzasının araşdırılması ilə bağlı qısa müddət ərzində hazırlayıb nəşr etdiyi ilkin hesabatı yüksək qiymətləndirib.

Məlumata görə, Aktau şəhərində baş verən qəza ilə bağlı yekun hesabat 2025-ci ilin sonuna qədər Çikaqo Konvensiyasına uyğun olaraq dərc ediləcək.