Trampın Quantanamo bazası ilə bağlı planı baş tutmadı

ABŞ Prezidenti Donald Trampın ölkənin Kubadakı Quantanamo bazasında miqrantların müvəqqəti saxlanma mərkəzinin genişləndirilməsi planının həyata keçirilməsi demək olar ki, baş tutmayıb.

presstvaz-ın xəbərinə görə, bu barədə NBC telekanalı məlumat verib.

Məlumata görə, buna maneə törədən əsas problemlər hüquqi və logistik çətinliklər, eləcə də əhəmiyyətli dərəcədə maliyyə xərcləri olub.

Mənbələrin bildirdiyinə görə, miqrantların Quantanamoya aparılması üçün təyyarələrdən, həmçinin hərbi təyyarələrdən istifadə olunur ki, bu da xərcləri artırır. Məsələn, martın 4-də içində doqquz miqrantın olduğu “C-130” hərbi təyyarəsinin bazaya uçuşu Pentaqona 207-249 min dollara başa gəlib ki, bu da adambaşına təxminən 23-27 min dollar təşkil edir.

Müvəqqəti saxlama təcridxanası hazırda tam hazır deyil. Artıq qurulmuş çadırlar ABŞ-nin İmmiqrasiya Xidmətinin və Gömrük Polisinin tələblərinə cavab vermir. Hazırda Quantanamoda cəmi 20 miqrant var və yaxın gələcəkdə yeni uçuşlar planlaşdırılmır.

ABŞ məmurları hesab edirlər ki, Quantanamo əvəzinə Texasdakı Fort-Bliss kimi digər hərbi bazalardan istifadə etmək daha sərfəli olacaq.

Materialda bildirildiyinə görə, Pentaqon, həmçinin əvvəllər bazaya yerləşdirilən mindən çox hərbçinin bir hissəsinin geri qaytarılması imkanını da müzakirə edir.