Gəncədə güclü külək fəsadlar törətdi: İri gövdəli ağac məktəbin qarşısında aşdı

Təbriz küçəsində hərəkətin intensiv olduğu vaxtda çinar ağacının budağı avtomobillərin üzərinə qırılıb

          presstvaz  xəbər verir ki, bu gün — 27 fevral  səhər saatlarından başlayaraq Gəncə şəhəri ərazisində hava şəraiti kəskin pisləşib, şiddətli külək müşahidə olunur. Təbiət hadisəsi şəhərin infrastrukturunda müəyyən çətinliklər yaradıb, bir neçə istiqamətdə işıqforların fəaliyyəti müvəqqəti dayanıb.

Məktəblilər üçün tükürpədici anlar: Xəsarət alan olmasa da, maddi ziyan var

         Ən təhlükəli vəziyyət şəhərin Təbriz küçəsində qeydə alınıb. Güclü küləyin təsirindən iri gövdəli çinar ağacının böyük bir budağı qırılaraq yolun hərəkət hissəsinə düşüb. Hadisənin baş verdiyi ərazi M. Ş. Vazeh adına 16 nömrəli tam orta məktəbin birbaşa qarşısıdır.

         presstvaz-ın hadisə yerində olan müxbiri bildirir ki, ağacın qırılması dərsin davam etdiyi və həm piyadaların, həm də avtomobillərin ən sıx olduğu vaxta təsadüf edib. Xoşbəxtlikdən, hadisə zamanı məktəblilər və yoldan keçən sakinlər arasında xəsarət alan olmayıb. Lakin ağac qırıntıları yoldan keçən avtomobillərin üzərinə sıçrayıb, nəqliyyat vasitələrinə maddi ziyan dəyib.

Aidiyyatı qurumlar xəbərdar edilib

         Hazırda ərazidə güclü külək davam edir. Sakinlərə və sürücülərə iri ağacların, reklam lövhələrinin və hündür binaların yaxınlığından keçərkən ehtiyatlı olmaq tövsiyə olunur. Hadisə yerinə müvafiq qurumların cəlb edilməsi və yolun təmizlənməsi istiqamətində işlərin aparılması gözlənilir.

presstvaz  hadisə yerindən ən son görüntüləri təqdim edir:

VİDEO MATERİAL

(Hadisə yerindən kadrlar: 27.02.2026, saat 12:30)

presstvaz   – Azərbaycanın etibarlı informasiya mənbəyi