Paytaxtda oğru ovuna davam: Kirayə evlərdən və zərgərlik mağazasından oğurluq edənlər yaxalandı

Polis əməkdaşları qapıları bir-bir yoxlayıb evlərə girən və mağazadan qızıl talayan şəxsləri saxlayıb

       Daxili İşlər Nazirliyinin (DİN) Mətbuat Xidmətindən presstvaz-a daxil olan məlumata görə, paytaxtın Nərimanov və Nizami rayonlarında vətəndaşların əmlakını talayan şəxslərə qarşı operativ tədbirlər keçirilib.

Nərimanovda “qapı yoxlayan” oğru ifşa olunub Nərimanov Rayon Polis İdarəsinin əməkdaşları tərəfindən keçirilən əməliyyatla 41 yaşlı M.Allahverdiyev saxlanılıb. Araşdırmalar zamanı məlum olub ki, o, gecə saatlarında yaşayış binalarına daxil olaraq mənzillərin qapılarını bir-bir yoxlayıb. Zərərçəkənin kirayə yaşadığı evin qapısının açıq və ya evdə kimsənin olmadığını fürsət bilən şəxs, oradan qızıl-zinət əşyaları və 540 manat nağd pul oğurlayıb.

        Həmçinin, rayon ərazisində aparılan digər tədbirlə 490 manat dəyərində təmir-tikinti alətləri oğurlamaqda şübhəli bilinən 22 yaşlı Z.Abbasov da yaxalanaraq istintaqa təhvil verilib.

Qarayevdə zərgərlik mağazasına hücum presstvaz xəbər verir ki, növbəti uğurlu əməliyyat Nizami rayonunda baş tutub. Rayonun Q.Qarayev prospektində yerləşən zərgərlik mağazalarının birindən 1800 manat dəyərində qızılın oğurlanması ilə bağlı 24-cü Polis Şöbəsinə məlumat daxil olub.

       Polis əməkdaşlarının çevik müdaxiləsi nəticəsində hadisəni törətməkdə şübhəli bilinən 53 yaşlı Zabil Abışov saxlanılıb. Məlum olub ki, o, satıcının diqqətinin yayındığı andan istifadə edərək qızıl bəzək əşyasını ələ keçirib və hadisə yerindən uzaqlaşıb.

Bütün faktlar üzrə araşdırmalar davam etdirilir. Polis vətəndaşları mənzillərinin təhlükəsizliyinə qarşı daha diqqətli olmağa və qapıların kilidləndiyinə əmin olmağa çağırır.

presstvaz    – Azərbaycanın etibarlı informasiya mənbəyi