Sağlamlığın açarı mətbəxdədir: Ürək və bağırsaqlar üçün möcüzəvi qida açıqlandı

Lobya, noxud, mərcimək və soya bitki mənşəli zülal, mürəkkəb karbohidratlar, lif və mikroelementləri özündə birləşdirən dəyərli qida məhsullarıdır.

presstvaz xəbər verir ki, qastroenteroloq, tibb elmləri namizədi Yevgeni Belousov ürək və bağırsaq sağlamlığı üçün əvəzsiz hesab edilən qida qrupunun adını Lenta.ru saytına açıqlayıb.

Həkim mədə-bağırsaq traktı və ürək-damar sisteminin sağlamlığı üçün ən faydalı məhsul qrupu kimi dənli paxlalı bitkiləri göstərib. Onun sözlərinə görə, bu məhsulların tərkibində yağ miqdarı azdır və doymuş yağlar demək olar ki, yoxdur. Məhz buna görə də paxlalılar Aralıq dənizi pəhrizindən tutmuş vegetarian qidalanmaya qədər bir çox sağlam rasionlara daxil edilir.

Mütəxəssis vurğulayıb ki, aparılan araşdırmalar dənli paxlalı bitkilərin müntəzəm istehlakının ürək-damar xəstəlikləri riskini azaltdığını sübut edir. Bu qidalar eyni zamanda ikinci tip diabetin, artıq çəkinin və bəzi xərçəng növlərinin profilaktikasında da mühüm rol oynayır.

Bundan əlavə, həkim qeyd edib ki, paxlalı bitkilər bağırsaq mikrobiotasına müsbət təsir göstərərək həzm sisteminin fəaliyyətini yaxşılaşdırır.