Fevralın 5-də itkin düşmüş 15 nəfər tapılıb

14 nəfər dələduzluq üzrə saxlanılıb, 21 kq narkotik götürülüb

           Daxili İşlər Nazirliyinin Mətbuat Xidmətindən presstvaz-a verilən məlumata görə, fevralın 5-də polis əməkdaşlarının keçirdikləri əməliyyat tədbirləri nəticəsində ailə üzvlərini məlumatlandırmadan yaşadığı ünvanı tərk etdiyinə görə itkin düşmüş kimi axtarışı aparılan 15 nəfər tapılaraq aidiyyəti üzrə təhvil verilib.

Eyni zamanda dələduzluğa görə axtarışda olan 14 nəfər saxlanılaraq istintaqa təhvil verilib.

          Həmin gün polis əməkdaşları tərəfindən ümumi çəkisi 21 kiloqrama yaxın narkotik vasitə aşkar edilərək götürülüb. Bu istiqamətdə qətiyyətli mübarizə tədbirləri davam etdirilir.

Daxili İşlər Nazirliyinin əməkdaşları qanunsuz saxlanılan odlu silah-sursatın aşkar olunması üzrə əməliyyat və profilaktik tədbirləri də davam etdiriblər. Fevralın 5-də paytaxt və respublikanın ayrı-ayrı rayonlarında 2 avtomat silah, 1 tapança, 2 qumbara, 21 tüfəng, 5 patron darağı, 1168 ədəd müxtəlif çaplı patron və 10 mərmi aşkar edilərək götürülüb.

presstvaz    – Azərbaycanın etibarlı informasiya mənbəyi