NATO “kommunikasiya beyni”ni Türkiyə proqram təminatına həvalə etdi

Şimali Atlantika Müqaviləsi Təşkilatı (NATO) “kommunikasiya beyni”ni Türkiyə proqram təminatına həvalə edib.

presstvaz “Haber Global”a istinadən verdiyi məlumata görə, hərbi təşkilat HAVELSAN şirkətindən şəbəkə proqramını almaq qərarına gəlib.

Məlumata görə, NATO bu strateji sahədə ən yüksək texniki balı HAVELSAN-a verib və bu qurumla işləmək qərara alınıb. Ətraflı müzakirələrdən sonra tərəflər razılığa gəliblər. Proqram təminatının təmin edilməsi üçün vacib müqavilə rəsmi olaraq dekabrın 18-də imzalanıb.

Məlumata görə, taktiki məlumat bağlantısı idarəetmə mərkəzi müasir orduların “kommunikasiya beyni” kimi təsvir olunur. Bu mərkəzlərdən qurulan şəbəkələr havada, quruda və dənizdə bütün dost qüvvələrin eyni əməliyyat mənzərəsini paylaşaraq, real vaxt rejimində ünsiyyət qurmasına imkan verir.

Komandanlıq və hesabat mərkəzləri həmin proqram təminatı vasitəsilə problemsiz şəkildə əlaqə qurur, eyni zamanda qırıcı təyyarələr, gəmilər və raket sistemləri buradan idarə olunur.