Azərbaycanlıların Türkiyə əmlak bazarına artan marağı: Trendlər və real səbəblər

Azərbaycanlı investorlardan Türkiyə daşınmaz əmlak bazarına artan axın: Trendin səbəbləri və perspektivləri

presstvaz Azərbaycan xəbər portalı mövzunu araşdırır

Son illər Azərbaycan vətəndaşlarının xarici daşınmaz əmlak bazarına marağı nəzərəçarpacaq dərəcədə artıb. Xüsusilə Türkiyə bu istiqamətdə əsas seçimlərdən birinə çevrilib. Türkiyə Statistika Qurumunun 2025-ci ilin yanvar–oktyabr aylarını əhatə edən rəsmi məlumatlarına əsasən, azərbaycanlılar bu dövrdə Türkiyədə ümumilikdə 741 mənzil alıblar. Bu göstərici ötən ilin analoji dövrü ilə müqayisədə təxminən 8,6 faiz artım deməkdir.

2025-ci ildə aylar üzrə satış göstəriciləri isə belə formalaşıb: yanvarda 50, fevralda 87, martda 66, apreldə 59, mayda 75, iyunda 71, iyulda 93, avqustda 77, sentyabrda 67 və oktyabrda 96 mənzil. Ən yüksək göstəricinin oktyabr ayında qeydə alınması prosesin davamlı xarakter daşıdığını göstərir.

Bəs Azərbaycan vətəndaşlarını Türkiyə əmlak bazarına yönəldən əsas amillər hansılardır? Bu maraq ölkədaxili qiymət artımı ilə bağlıdır, yoxsa daha dərin iqtisadi və sosial səbəblər mövcuddur?

Ekspertlərin Presstv.az-a bildirdiyinə görə, bu tendensiya yalnız Azərbaycandakı daşınmaz əmlak qiymətləri ilə əlaqəli deyil. Türkiyədə miqrasiya və yaşayış qaydalarının dəyişməsi, oturum və vətəndaşlıq üçün əmlak sahibliyinin önə çıxması, həmçinin geniş investisiya imkanları bu seçimi stimullaşdıran əsas faktorlardır. Xüsusilə İstanbul, Ankara, Antalya, Bodrum, İzmir və Kuşadası kimi şəhərlər azərbaycanlı alıcılar üçün prioritet hesab olunur. Alıcılar daha çox zəlzələ riskinin nisbətən az olduğu bölgələrə üstünlük verirlər.

İnvestisiya, kirayə gəliri və yaşayış rahatlığı: Türkiyə niyə cəlbedicidir?

presstvaz Azərbaycan xəbər portalının təhlili

Mütəxəssislərin fikrincə, Türkiyə bazarına marağın əsas səbəblərindən biri kirayə gəlirlərinin yüksək olmasıdır. Müqayisə üçün qeyd edilir ki, Bakıda təxminən 200 min manat dəyərində olan mənzildən aylıq 600–800 manat kirayə gəliri əldə etmək mümkündürsə, eyni məbləğlə Türkiyədə alınan əmlakdan 1 000–1 200 manat civarında gəlir götürmək mümkündür. Bu isə Türkiyəni sərfəli investisiya məkanı kimi ön plana çıxarır.

Digər mühüm məqam Türkiyədə yaşayış və biznes mühitinin daha çevik və rahat olmasıdır. Azərbaycan və Türkiyə arasında mövcud olan sıx siyasi, iqtisadi və mədəni əlaqələr, dil və mentalitet yaxınlığı vətəndaşlarımızın bu ölkəyə inteqrasiyasını asanlaşdırır. Təhsil, iş, daimi yaşayış və ya mövsümi istirahət məqsədilə Türkiyəyə üz tutanlar üçün ev sahibi olmaq uzunmüddətli perspektivdə daha məqsədəuyğun sayılır.

Qiymətlərə gəlincə, populyar şəhərlərdə mənzil dəyərləri əraziyə və binanın xüsusiyyətlərinə görə dəyişir. İstanbulda birotaqlı mənzillər orta hesabla 120–180 min ABŞ dolları, Ankarada 80–130 min dollar, Antalyada 90–150 min dollar aralığında təklif olunur. Bodrumda qiymətlər daha yüksəkdir və əsasən 150 min dollardan başlayır. İzmir və Kuşadası isə həm qiymət, həm də yaşayış baxımından daha balanslı seçim kimi dəyərləndirilir.

Ekspertlər hesab edirlər ki, bu tendensiya yaxın illərdə də davam edəcək. Azərbaycanlı alıcılar Türkiyədə təkcə yaşamaq üçün deyil, həm də gəlir gətirən uzunmüddətli investisiya kimi daşınmaz əmlaka maraq göstərməkdə davam edəcəklər.