Səfərbərlik Xidmətində 158 qanunsuz hərəkət aşkarlanıb, 9 nəfər işdən çıxarılıb

Səfərbərlik və Hərbi Xidmətə Çağırış üzrə Dövlət Xidmətində korrupsiyaya qarşı mübarizə və şəffaflığın artırılması məqsədi ilə vətəndaş cəmiyyəti institutlarının nümayəndələri ilə görüş keçirilib.

presstvaz bildirir ki, bu barədə  Dövlət Xidmətindən  verilən məlumata görə, görüşdə idarənin Təşkilati Nəzarət Baş İdarəsinin rəisi, polkovnik Əziz Hidayev cari ildə xidmətin fəaliyyətinə nəzarət nəticələri barədə məlumat verib. Onun sözlərinə görə, 2023-cü ildə əməkdaşların əməlində 78, 2024-cü ildə 249, 2025-ci ilin 11 ayında isə 158 qeyri-qanuni hərəkət aşkarlanıb. Bu faktlarla bağlı müxtəlif inzibati tənbeh tədbirləri görülüb, ümumilikdə 9 əməkdaş tutduğu vəzifədən azad edilərək ehtiyata buraxılıb. Eyni zamanda, üç il ərzində ümumilikdə yüzlərlə fakt araşdırılması üçün prokurorluq orqanlarına göndərilib.

Görüş iştirakçılarına xidmətin fəaliyyətində şəffaflığın artırılması, korrupsiyaya şərait yaradan halların aradan qaldırılması və vətəndaşlara göstərilən xidmətlərin elektronlaşdırılması sahəsində aparılan işlər barədə ətraflı məlumat verilib. Qeyd olunub ki, rəqəmsal texnologiyaların tətbiqi nəticəsində vətəndaşlar artıq hərbi məlumatlarına “mygov” platforması üzərindən asan və təhlükəsiz şəkildə çıxış əldə edə bilirlər. Həm portal, həm də mobil tətbiq vasitəsilə sənədləri PDF formatında yükləmək və rəqəmsal şəkildə istifadə etmək mümkündür.

Tədbir çərçivəsində qarşıda duran məsələlər müzakirə olunub, vətəndaş cəmiyyəti institutlarının təklifləri dinlənilib və əməkdaşlığın daha da genişləndirilməsi istiqamətində fikir mübadiləsi aparılıb.\oxu.az/