DÇ-2026-ya vəsiqə qazanan yığmaları böyük pullar gözləyir

FIFA-nın gələn il keçiriləcək futbol üzrə dünya çempionatına (DÇ-2026) böyük məbləğdə mükafatlar ayıracağı gözlənilir.

presstvaz “Sözcü” qəzetinə istinadən xəbər verir ki, dünyanın ali futbol təşkilatı final mərhələsinə təxminən bir milyard dollar pul ayıracaq.

Məlumata görə, DÇ-2026-ya vəsiqə qazanan yığmaların hər biri avtomatik olaraq 13 milyon dollara sahib çıxacaq.

Qrup mərhələsində hər qələbəyə iki milyon, heç-heçəyə isə bir milyon dollar veriləcəyi vurğulanır.

FIFA 2022-ci ildə Qətərdə keçirilən dünya çempionatına 440 milyon dollar pul mükafatı ayırıb. Son dünya çempionu Argentina təxminən 42 milyon dollar qazanıb. DÇ-2026-nın qalibinin isə təxminən 80 milyon dollar qazanacağı gözlənilir.

FIFA rəsmi rəqəmləri dekabrın 5-də keçiriləcək qrup mərhələsinin püşkatma mərasimindən sonra açıqlayacaq.

Ali futbol qurumunun DÇ-2026-da mükafat bölgüsünün təxminən belə olacağı iddia edilir:

Qrup oyunları: Turnirə vəsiqə qazanmaq 13 milyon dollar. Qrupda hər qələbəyə iki milyon dollar, heç-heçəyə bir milyon dollar;

1/8 finala vəsiqə: Hər komandaya 7.5 milyon dollar;

1/4 finala vəsiqə: Hər komandaya 13 milyon 125 min dollar;

Yarımfinala vəsiqə: Hər komandaya 21 milyon dollar;

Finala vəsiqə: Uduzan komandaya 30 milyon dollar;

Çempion: 40 milyon dollar.

Qeyd edək ki, DÇ-2026-da 48 milli komanda iştirak edəcək. Turnir iyunun 11-dən iyulun 19-dək üç ölkədə – ABŞ, Kanada və Meksikada keçiriləcək.