HƏMAS İsrail qüvvələrinin Qəzza məhəllələrindən çıxmasına israr edir

Fələstinin HƏMAS hərəkatı Qəzza zolağında vəziyyətin ABŞ Prezidenti Donald Trampın planı üzrə nizamlanması ilə bağlı yenidən başlanmış məsləhətləşmələrdə əlində olan girovların mübadiləsindən əvvəl İsraildən atəşkəs elan edilməsini və qoşunların anklavın məhəllələrindən çıxarılmasını tələb edib.

presstvaz xəbər verir ki, bu barədə məlumatı “Sky News Arabia” telekanalı yayıb.

Vasitəçi nümayəndə heyətlərindən birinə yaxın mənbənin məlumatına görə, HƏMAS dolayı danışıqların birinci raundunda əlində olan girovların azadlığa buraxılmasından əvvəl atəşkəs elan edilməsi, İsrail qüvvələrinin sektorun əsas istiqamətlərindən geri çəkilməsi, ordu bölmələrinin Qəzza məhəllələrindən çıxarılması şərtlərini irəli sürüb.

Bundan əlavə, o, girovlar müqabilində azad edilməli olan fələstinlilərin siyahısına israrla İsrail həbsxanalarında ömürlük həbs cəzası çəkən ən nüfuzlu tərəfdarlarının salınmasını tələb edib. Bildirilir ki, HƏMAS-ın bu tələbi vəziyyətin nizamlanması yolunda ən mürəkkəb məsələlərdən biridir və münaqişə tərəfləri arasında ümumi razılaşmanın əldə edilməsini xeyli çətinləşdirə bilər.