Əfqanıstan veteranından Alla Puqaçovaya qarşı böyük məbləğdə iddia

Rusiyada Moskvanın Tverskoy Məhkəməsi Əfqanıstanın “döyüş əməliyyatları veteranı” Aleksandr Treşevin müğənni Alla Puqaçovaya qarşı qaldırdığı iddianı qeydə alıb.

presstvaz-ın xəbərinə görə, bu barədə “RIA Novosti” iş materiallarına istinadən məlumat verib.

Məlumata görə, iddia fiziki və hüquqi şəxslərin şərəfi, ləyaqəti və işgüzar nüfuzunu qorumaq məqsədilə qaldırılıb.

Veteran Puqaçovadan 1.5 milyard rubl pul tələb edib.

Qeyd edilib ki, iddia SSRİ Xalq artistinin jurnalist Katerina Qordeyevaya (Rusiya Ədliyyə Nazirliyi tərəfindən xarici agent elan edilib) verdiyi müsahibədən sonra qaldırılıb. Həmin müsahibədə Treşev Cövhər Dudayevin tərifləndiyini görüb ki, bu da onun fikrincə, rus xalqını təhqir etmək deməkdir. Bundan başqa, iddiada Puqaçovanın Rusiya Federasiyasının prezidentini, ordusunu və hüquq-mühafizə orqanlarını nüfuzdan salan ifadələr işlətdiyi ilə bağlı fikirlər də əksini tapıb. Treşev iddianı eyni vaxtda iki Moskva məhkəməsinə yönləndirdiyini bildirib.