“Salam əleyküm, qardaş!” – Mbappe Qazaxıstanda azarkeşləri təəccübləndirdi

Sosial şəbəkələrdə “Real Madrid”in ulduz hücumçusu Kilian Mbappenin iştirakı ilə maraqlı görüntülər yayılıb.

presstvaz xəbər verir ki, Çempionlar Liqasının növbəti oyunu üçün Qazaxıstana yollanan fransalı forvard yerli ənənələrə və azarkeşlərə xüsusi hörmət nümayiş etdirib.

Belə ki, komandanın yerləşdiyi hotelin girişində bir neçə qazaxıstanlı azarkeş futbolçunu qarşılamaq üçün toplaşıb. Onlardan biri Mbappeyə ənənəvi müsəlman salamı ilə müraciət edib: “Salam əleyküm, qardaş!” Ulduz hücumçu isə təbəssümlə: “Əleyküməs salam”, – deyərək azarkeşlə “yumruq toxunuşu” edib.

Fransalı futbolçu, həmçinin kiçik bir azarkeşi də sevindirib. Onun köynəyini imzalayan Mbappenin səmimi anları uşağın anası tərəfindən sosial şəbəkələrdə paylaşılaraq böyük maraq doğurub.

Qeyd edək ki, sabah – sentyabrın 30-da Almatının “Mərkəzi” stadionunda “Kayrat” (Almatı) – “Real Madrid” qarşılaşması keçiriləcək. Görüş Bakı vaxtı ilə saat 20:45-də başlayacaq.

Xatırladaq ki, Çempionlar Liqasının qrup mərhələsinin ilk turunda “Kayrat” Lissabonun “Sportinq”inə 1:4 hesabı ilə uduzub, “Real Madrid” isə evdə “Marsel”i 2:1 hesabı ilə məğlub edib.