Fergus Auld: “Böyük Britaniya hökuməti Cənubi Qafqazda davamlı sülhə və rifaha öz töhfəsini vermək niyyətindədir”

“Böyük Britaniya hökuməti Cənubi Qafqazda davamlı sülhə və rifaha öz töhfəsini vermək niyyətindədir”.

presstvaz xəbər verir ki, bunu Bakıda keçirilən I Azərbaycan – Birləşmiş Krallıq Siyasət Dialoqunun açılış mərasimində Böyük Britaniyanın Azərbaycandakı səfiri Fergus Auld bildirib.

O, Böyük Britaniyanın Azərbaycandakı diplomatik missiyasına rəhbərlik etdiyi müddətdə qlobal əhəmiyyətli hadisələrin şahidi olduğunu diqqətə çatdırıb:

“Bu müddət ərzində Azərbaycan öz ərazi bütövlüyünü tam bərpa etdi, Rusiya sülhməramlı kontingenti vaxtından əvvəl çıxarıldı, ötən ay isə baş nazir Paşinyanla sülh sazişi paraflandı. Həmçinin Minsk qrupu buraxıldı. İndi isə həmin ərazilərdə həyat yenidən canlanır, Füzulidə aeroport, Ağdamda isə dəmiryol xətti istifadəyə verilib”.

“İkitərəfli münasibətlərdə təkcə son bir ildə mən ilk dəfə olaraq Böyük Britaniyanın vəzifədə olan Baş naziri Kir Starmerin Azərbaycana səfərini qarşıladım. İlk dəfə olaraq buraya hərbi attaşe təyin edildi, Azərbaycanın energetika naziri ilə keçirilən İqtisadi Komissiyanın iclasında iştirak etdim, həmçinin dörd həftə əvvəl Avropa işləri üzrə nazir Stiven Dautini qəbul etdim. Prezident İlham Əliyev ilə razılaşdırıldığı kimi, münasibətlərimizi strateji tərəfdaşlıq səviyyəsinə qaldırmaq niyyətindəyik”, – deyə səfir əlavə edib.