ABŞ-də 140 il əvvəl itən “kabus gəmi” tapıldı

ABŞ-nin Viskonsin ştatı sahillərində 140 il əvvəl şiddətli fırtınada itən yük gəmisi – “F.J. King” qayığının qalıqları tapılıb.

presstvaz xəbər verir ki, məlumatı Viskonsin Tarix Cəmiyyəti və Viskonsin Sualtı Arxeologiya Assosiasiyası təsdiqləyib.

Qalıqlar gölün sahilindəki kiçik Beyli limanı yaxınlığında aşkarlanıb. Uzunluğu 50 metr olan, üçdirəkli “F.J. King” 15 sentyabr 1886-cı ildə Miçiqanın Eskanaba şəhərindən Çikaqoya dəmir filizi daşıyarkən güclü fırtınaya düşüb. Dalğaların təsirindən göyərtəsi dağılan gəmi kapitan Uilyam Qriffin və heyətin bütün səylərinə baxmayaraq batıb. Lakin ekipaj başqa bir qayıq tərəfindən xilas edilərək Beyli limanına aparılıb.

Onilliklər boyu gəminin dəqiq batdığı yer barədə ziddiyyətli məlumatlar onun tapılmasına mane olub. 1970-ci illərdən bəri keçirilən çoxsaylı ekspedisiyalar nəticəsiz qayıtdığından, “F.J. King” “kabus gəmi” adlandırılıb.

Dəniz tədqiqatçısı Brendon Baylodun rəhbərlik etdiyi komanda kapitanın fırtına zamanı yanlış koordinatlar verdiyini ehtimal edərək, axtarışları mayak nəzarətçisinin qeydlərində göstərilən beş kvadrat kilometrlik ərazidə cəmləşdirib. Nəticədə radar suyun altında 50 metrlik obyekt qeydə alıb və gəminin özəyinin bütöv halda qaldığı müəyyən edilib.