İnformasiya yayıcılığı cəmiyyətdə bölücülük yaratmamalıdır

Rəşad Məcid: Media nümayəndələri daha məsuliyyətli olmalıdır

       Məcburi köçkünlərin öz doğma yurdlarına qayıdışı ilə bağlı mövzu son günlər sosial şəbəkələrdə müxtəlif mövqelərdən müzakirə olunur. Azərbaycan Mətbuat Şurasının sədri Rəşad Məcid məsələ ilə bağlı mövqeyini açıqlayaraq bildirib ki, informasiya yayıcılığı sahəsində məsuliyyətli davranış cəmiyyət üçün xüsusi əhəmiyyət kəsb edir.

presstvaz bildirir ki, Rəşad Məcid “Facebook” hesabında məsələyə münasibət bildirərkən, müzakirələrin əslində “hiddət və qəzəb yağışına” çevrildiyini qeyd edib:

       “Mətbuat Şurası olaraq vəziyyət daim diqqətimizdədir. Bununla bağlı profilaktik söhbətlər aparmışıq və dəfələrlə vurğulamışıq ki, insanları dini, dili, irqi və ya yaşadığı yerinə görə fərqləndirmək yolverilməzdir. Media nümayəndələri və informasiya yayıcıları təqdimatlarında həssas olmalı, cəmiyyətdə nifaq yarada biləcək ifadələrdən çəkinməlidirlər”.

MŞ sədrinin sözlərinə görə, bəzi sosial şəbəkə paylaşımlarında məqsədli şəkildə nifaq yaratmaq cəhdləri müşahidə olunur:

       “Sanki kimlərsə pusquda dayanıb ki, bir ifadəni alova çevirsin. Onlar fürsət tapan kimi 44 günlük müharibədə əldə etdiyimiz Zəfəri və doğma torpaqlara sahib çıxmaq iradəmizi kiçiltməyə çalışırlar”.

Rəşad Məcid vurğulayıb ki, informasiya yayıcıları söylədikləri hər kəlməyə görə məsuliyyət daşımalıdır:

       “Unutmaq olmaz ki, bu məsuliyyət ölkəmizin firavanlığı, cəmiyyətimizdə birgəyaşayış prinsiplərinin qorunması və dövlətimizin inkişafı baxımından son dərəcə vacibdir”.

MŞ sədri həmçinin qeyd edib ki, belə halların hüquqi qiymətləndirilməsi də mümkündür:

       “Əgər kimsə çıxışında və ya açıqlamasında cəmiyyətdə nifaq yaradırsa, bu, hüquqi müstəvidə də dəyərləndirilə bilər. Bunun nəzərə alınması çox vacibdir”.

Rəşad CƏFƏRLİ,

Mənbə: Presstv.az – Azərbaycan xəbər portalı

“Presstv”az– Azərbaycanın etibarlı informasiya mənbəyi.