Aİ Ermənistana dəstəyini 2.5 milyard avroya qədər artırır

Avropa İttifaqı (Aİ) “Global Gateway” strategiyası çərçivəsində Ermənistana dəstəyi 2.5 milyard avroya qədər artırır – bu vəsait nəqliyyat, energetika, rəqəmsal infrastruktur və kiçik biznes sahələrinə yönəldiləcək.

presstvaz xəbər verir ki, bu qərar Avropa Şurasının sədri Antonio Koşta, Avropa Komissiyasının prezidenti Ursula fon der Lyayen və Ermənistanın baş naziri Nikol Paşinyan arasında Brüsseldə keçirilmiş danışıqların yekununda qəbul olunmuş birgə bəyanatda öz əksini tapıb.

Tərəflər bu istiqamətdə sıx əməkdaşlığı inkişaf etdirmək və birgə səyləri koordinasiya etmək barədə razılığa gəliblər.

“Avropa İttifaqı Ermənistana davamlılıq və uzunmüddətli inkişaf sahəsində güclü dəstəyini, əhəmiyyətli maliyyə və texniki yardımla təsdiqlədi. “Global Gateway” strategiyası çərçivəsində Aİ-nin Ermənistana yatırdığı investisiyaların həcminin 2.5 milyard avroya çatacağı gözlənilir. 2024-cü ilin aprelində elan olunmuş 270 milyon avroluq Dayanıqlılıq və İnkişaf Planı Aİ-nin Ermənistan üçün maliyyəsini 50% artırdı. Bu vəsaitin 200 milyon avrosu qrant, 70 milyon avrosu isə investisiya cəlb etmək məqsədilə verilmiş qrant maliyyəsi şəklində təqdim olunub. Aİ Ermənistanın sosial-iqtisadi islahatlar proqramını, sektoral əməkdaşlığın dərinləşdirilməsini və energetika, nəqliyyat və özəl sektor sahələrinə investisiyaları dəstəkləməyə davam edir”, – deyə birgə bəyanatda qeyd olunub.