ABŞ MKİ-nin keçmiş rəhbəri Trampla bağlı yalan şahidlikdə ittiham olunur

ABŞ Mərkəzi Kəşfiyyat İdarəsinin (MKİ) sabiq rəhbəri, Barak Obamanın prezidentliyi dövründə bu vəzifəni tutmuş Con Brennanın Konqresə yalan ifadə verməsi ilə bağlı istintaqa cəlb oluna bilər.

presstvaz xəbər verir ki, bu barədə “Breitbart News” mənbələrə istinadla məlumat yayıb.

Bildirilib ki, MKİ-nin Analitik Direktoratının hesabatında Rusiyanın 2016-cı il prezident seçkisinə müdaxiləsi ilə bağlı sənədin ciddi prosedur pozuntuları ilə hazırlandığı və siyasi motivli ola biləcəyi qeyd edilib.

Hesabatda xüsusilə Brennanın “Stil dosyesi” adlanan sənədin irəli sürülməsindəki rolu vurğulanır – bu sənəd Rusiya ilə o zaman ABŞ prezidentliyinə namizəd olan Donald Tramp arasında sövdələşmə barədə yoxlanılmamış və sonradan təkzib olunmuş iddiaları ehtiva edib. Dosye “Fusion GPS” şirkəti və Britaniyanın MI6 kəşfiyyatının keçmiş əməkdaşı Kristofer Stil tərəfindən Trampın rəqiblərinin sifarişi ilə tərtib edilib.

Mənbələrə görə, ABŞ Konqresində Brennanın bu hərəkətləri ciddi narahatlıq doğurub və məsələnin Ədliyyə Nazirliyi tərəfindən araşdırılması istisna edilmir.

Qeyd edək ki, ABŞ xüsusi prokuroru Robert Müller 2019-cu ildə yaydığı hesabatda Donald Tramp və Rusiya arasında sövdələşmə faktını təsdiqləmədiyini bildirib. Tramp və Moskva bu iddiaları dəfələrlə təkzib ediblər.