“İnter” və “Monterrey” klublararası dünya çempionatının pley-offuna çıxdılar

İtaliya “İnter”i və Meksika “Monterrey”i ABŞ-də keçirilən klublararası dünya çempionatının 1/8 finalına çıxıblar.

presstvaz-ın məlumatına görə, komandalar E qrupunda çıxış edirdilər.

Qrup mərhələsinin üçüncü tur matçında “İnter” Argentina “River Plate”ini 2:0 hesabı ilə məğlub edib. Argentina komandası matçı doqquz nəfərlə başa vurub: 65-ci dəqiqədə müdafiəçi Lukas Martines qırmızı vərəqə alaraq meydandan qovulub, ikinci hissəyə əlavə edilmiş beşinci dəqiqədə müdafiəçi Qustavo Montiel ikinci sarı vərəqəni alıb.

“Monterrey” Yaponiya “Urawa Red Diamonds”unu 4:0 hesabı ilə darmadağın edib.

Qrup mərhələsinin nəticələrinə görə, birinci yeri “İnter” (7 xal), ikinci yeri “Monterrey” (5 xal), üçüncü yeri isə “River Plate” (4 xal) tutub. “Urawa Red Diamonds” dördüncü olub, komanda heç bir xal qazana bilməyib.

1/8 finalda “İnter” Braziliya “Fluminense”si ilə qarşılaşacaq. “Monterrey” isə Almaniya “Borussiya”sına qarşı matç keçirəcək.

Klublararası dünya çempionatı ABŞ-də keçirilir. Turnirdə ilk dəfə olaraq səkkiz qrupa bölünmüş 32 komanda iştirak edir. Hər qrupdan ən yaxşı iki komanda 1/8 finala çıxır. Final matçı 13 iyulda keçiriləcək.