İrəvan Moskvaya nota göndərdi

“İrəvan Moskvaya nota göndərərək, Rusiyada bəzi hakimiyyət nümayəndələrinin erməniəsilli rusiyalı iş adamı, “Taşir” şirkətlər qrupunun prezidenti Samvel Karapetyanın işi ilə bağlı açıqlamalarını Ermənistanın daxili işlərinə müdaxilə kimi qiymətləndirib”.

presstvaz-ın “İnterfaks”a istinadən verdiyi xəbərə görə, bunu Ermənistanın xarici işlər naziri Ararat Mirzoyan parlamentdə çıxışı zamanı deyib.

Onun sözlərinə görə, İrəvan Rusiya mətbuatında, eləcə də siyasətçilər və deputatlar tərəfindən səsləndirilən bəyanatları nəinki Ermənistan və Rusiya arasında ənənəvi dostluğa zidd, həm də Ermənistanın daxili işlərinə birbaşa, açıq və müdaxilə, suverenliyimizə və demokratiyamıza qəsd hesab edir.

Nazir bildirib ki, İrəvan bu barədə rusiyalı həmkarlarını məlumatlandırıb. “Hesab edirəm ki, bu vaxta qədər rəsmi nota artıq öz ünvanına çatıb”, – deyə Mirzoyan vurğulayıb.

Xatırladaq ki, Ermənistanın Daxili İşlər Nazirliyinin Mütəşəkkil Cinayətkarlıqla Mübarizə Baş İdarəsinin əməkdaşları erməniəsilli rusiyalı iş adamı, “Taşir” şirkətlər qrupunun prezidenti və təsisçisi Samvel Karapetyanı saxlayıblar.

Ermənistanın istintaq orqanları Karapetyanı ölkədə hakimiyyətin ələ keçirilməsinə açıq çağırışlarda ittiham edib.