İsveçrədə qopmuş buzlağın yerində göl əmələ gəlib: Daşqın təhlükəsi var

İsveçrənin Vale kantonunda qopmuş buzlağın parçaları Lontsa çayının məcrasını bağlayıb və bu da süni gölün yaranmasına, həmçinin daşqın təhlükəsinə səbəb olub.

presstvaz-ın xəbərinə görə, bu barədə “RTS” teleradio şirkəti məlumat verib.

Məlumata görə, buzlağın çökdüyü yerdə əmələ gələn süni göl böyüməkdə davam edir. Yerli administrasiya daşqın təhlükəsi ilə bağlı axının aşağı hissəsində yerləşən Viler və Kippel kəndlərinin sakinlərini qismən təxliyə edib.

İsveçrə Kantonlar Şurası Lontsa çayı vadisində xüsusi vəziyyət rejiminin tətbiq edildiyini elan edib. Hökumət kömək üçün orduya müraciət edib.

Qeyd edək ki, daha əvvəl İsveçrə KİV-nin verdiyi xəbərə görə, mayın 28-də Alp dağlarında qopmuş buzlaq və palçıq axını 300 nəfərin yaşadığı Blatten kəndinin böyük hissəsini dağıdıb. Yerli hakimiyyət orqanlarının nümayəndəsi Mattias Ebener hadisə zamanı ən azı bir nəfərin itkin düşdüyünü bildirib. Mayın 19-da geoloji xidmətin uçqun ola biləcəyi barədə xəbərdarlığından sonra kənd təxliyə edilib.