Bakı-Quba yolunda ağır QƏZA: Yaralananların adları məlum oldu

Bakı-Quba yolunun 30-cu kilometrliyində ağır yol-nəqliyyat hadisəsi zamanı yaralananların adları məlum olub.

presstvaz “Report”a istinadla xəbər verir ki, hadisə zamanı 1983-cü il təvəllüdlü Samiq Fərhad oğlu Abdullayevə məxsus, dayanmış vəziyyətdə olan “MAN” markalı, 77-BT-544 dövlət nömrə nişanlı yük avtomobilinə, 2001-ci il təvəllüdlü Ramazan Habil oğlu Həsənovun idarə etdiyi “Mercedes ML” markalı, 77-TB-495 dövlət nömrə nişanlı minik avtomobili çırpılıb.

Qəza nəticəsində sürücü Ramazan Həsənov qapalı kəllə-beyin travması və baş beynin silkələnməsi diaqnozu ilə xəstəxanaya yerləşdirilib. Yük avtomobilinin sahibi Samiq Abdullayev isə döş qəfəsində əzik və sağ ayağında sınıq xəsarətləri alıb.

“Mercedes ML”də sərnişin qismində olan, 1986-cı il təvəllüdlü Ruslan İsmayıl oğlu Rzayev isə aldığı ağır xəsarətlər səbəbindən hadisə yerində həlak olub.

Faktla bağlı araşdırma aparılır.

20 may, 23:01

Bakı-Quba yolunun Sumqayıtdan keçən hissəsində qəza olub, ölən və yaralananlar var.

presstvaz “Report”a istinadən xəbər verir ki, hadisə zamanı “Mercedes-Benz” markalı minik avtomobili yük maşınına çırpılıb.

Toqquşma nəticəsində 1986-cı il təvəllüdlü Ruslan İsmayıl oğlu Rzayev hadisə yerində dünyasını dəyişib, 2 nəfər isə müxtəlif dərəcəli bədən xəsarətləri alıb.

Yaralılar təcili tibbi yardım vasitəsilə xəstəxanaya çatdırılıblar. Hadisə yerinə Fövqəladə Hallar Nazirliyinin (FHN) və Daxili İşlər Nazirliyinin (DİN) əməkdaşları cəlb olunublar.

Hadisə baş verdiyi zaman yük avtomobili yolun kənarında dayanmış vəziyyətdə olub. Onun sürücüsü maşının arxa hissəsində olub. Bu zaman Quba istiqamətində yüksək sürətlə hərəkət edən “Mercedes” markalı minik avtomobili əvvəlcə yük maşınının sürücüsünü vurub, daha sonra isə özü də yük maşınına çırpılıb.

Hadisə nəticəsində yük maşınının sürücüsü ağır xəsarətlər alıb. “Mercedes” markalı avtomobilin sürücüsü də xəsarət alaraq xəstəxanaya yerləşdirilib. Təəssüf ki, həmin avtomobildə sərnişin qismində olan şəxs hadisə yerində həyatını itirib.

Sumqayıt Tibb Mərkəzindən verilən məlumata görə, müxtəlif bədən xəsarətləri alan şəxslərə zəruri tibbi yardımlar göstərilib. Hazırda müalicələri davam etdirilir, vəziyyətləri orta ağırdır.