Qazaxda mina partlayışı nəticəsində xəsarət alan şəxsin SON VƏZİYYƏTİ AÇIQLANDI

İşğaldan azad edilmiş Qazax rayonunun Qızılhacılı kəndində mina partlaması nəticəsində xəsarət alan şəxsin son vəziyyəti açıqlanıb.

Tibbi Ərazi Bölmələrini İdarəetmə Birliyindən (TƏBİB) presstvaz-ın sorğusuna cavab olaraq bildirilib ki, aprelin 28-də, saat 9:45-də mina partlayışı hadisəsi səbəbilə xəsarət alan bir nəfər (kişi cinsli) Qazax Rayon Mərkəzi Xəstəxanasının Təcili tibbi yardım şöbəsinə hospitalizasiya olunub.

“Alın nahiyəsinin göz ətrafı toxumalarının və burunun çapılmış yarası diaqnozu təyin olunan 1985-ci il təvəllüdlü şəxsə zəruri tibbi xidmət göstərildikdən sonra, tibb müəssisəsinin Cərrahiyyə şöbəsinə yerləşdirilib, vəziyyəti stabil qiymətləndirilir”, – deyə məlumatda bildirilir.

13:16

İşğaldan azad edilmiş Qazax rayonunun Qızılhacılı kəndi ərazisində 2025-ci il 28 aprel tarixində mina partlayıb.

presstvaz xəbər verir ki, bu barədə Azərbaycan Respublikasının Minatəmizləmə Agentliyi məlumat yayıb.

Agentliyin əməkdaşı, 1985-ci il təvəllüdlü Elnur Oruc oğlu Paşayev xidməti vəzifəsini yerinə yetirərkən piyada əleyhinə mina partlayışı baş verib. Hadisə nəticəsində Paşayev Elnur bədənin müxtəlif nahiyələrində yüngül xəsarətlər alıb.

Xəsarət alan əməkdaş rayon mərkəzi xəstəxanasına təxliyə edilib. Vəziyyəti qənaətbəxşdir, həyati təhlükəsi yoxdur.

Xatırladaq ki, Qızılhacılı kəndi 2024-cü il mayın 24-də Bağanıs Ayrım, Aşağı Əskipara və Xeyrımlı ilə birlikdə Ermənistan tərəfindən Azərbaycana qaytarılıb.