Xidmət rəisi: “Bakı Bəyannaməsi növbəti illər üçün əsas istiqamətləri müəyyən edir”

“Bu gün ölkəmizdə Mərkəzi Asiya dövlətlərini, regionumuzdan Azərbaycanı, Türkiyəni, İranı, həmçinin Pakistanı və İtaliyanı birləşdirən Almatı Prosesinə hazırlıq konfransı keçirilir. Almatı Prosesinin məqsədi qeyd olunan ölkələrin əhatə edildiyi regionlarda miqrasiya və qaçqınların hüquqlarının müdafiəsi üzrə məsələlər istiqamətində əməkdaşlığı dərinləşdirmək, qanuni miqrasiyanı təşviq etmək, asanlaşdırmaq və aidiyyəti dövlət qurumları və dövlətlər arasında əlaqələri gücləndirməkdir”.

presstvaz xəbər verir ki, bunu Dövlət Miqrasiya Xidmətinin rəisi Vüsal Hüseynov Azərbaycan Respublikasının Almatı Prosesinə ikiillik sədrliyinin (2023-24-cü illər) yekunu olaraq keçirilən Nazirlər Konfransında deyib.

O bildirib ki, bugünkü tədbirin məqsədi əsas üç istiqaməti ehtiva edir:

“Birincisi, Azərbaycanın sədrliyinə və ümumən son iki il ərzində Almatı Prosesinin inkişafına nəzər yetirmək, ikincisi, sədrliyin yeni sədrə ötürülməsi, bu, Qazaxıstan Respublikasıdır, üçüncüsü isə təşkilatın növbəti illər üçün istiqamətlərini müzakirə etməkdir.

Həmçinin bu Nazirlər Konfransında Almatı Prosesi üçün yaxşı ənənə olan bir hadisə də baş verib ki, bu da Bakı Bəyannaməsinin qəbul edilməsidir.

Bakı Bəyannaməsi Azərbaycanın təşəbbüsü ilə hazırlanan və razılaşdırılan bir sənəddir. Bakı Bəyannaməsi növbəti illər üçün fokuslanmalı olan əsas istiqamətləri müəyyən edir. Bu, miqrasiya prosesləri ilə bağlı statistika, data mübadiləsinin təşkili, qanunsuz miqrasiyaya qarşı tədbirlərin keçirilməsi üçün əlaqələndirmənin təmini və o cümlədən Almatı Prosesinə üzv dövlətlərin kadr potensialının, biliklərinin artırılmasına yönəlik birgə tədbirlərin keçirilməsidir. Bu xüsusda da müsbət bir məqam da ondan ibarətdir ki, Azərbaycanda fəaliyyət göstərən Miqrasiya üzrə Regional Təlim Mərkəzi bu məqsədlər üçün ixtisaslaşmış mərkəz kimi müəyyən edilir”.