İşemik ürək xəstəliyinin inkişafını sürətləndirən pis vərdişlər

Ürəyin işemik xəstəliyi ürək əzələsinə qan tədarükünün pozulması nəticəsində inkişaf edən xəstəlikdir. Ən təhlükəlisi odur ki, çox vaxt bu xəstəlik illərlə simptomsuz olur və bir çox insan bunu yalnız infarkt keçirdikdən sonra öyrənir. Statistikaya görə, özünü sağlam hesab edən 55-75 yaşlı hər səkkizinci şəxsdə, əslində, artıq bu xəstəliyin gizli forması var.

presstvaz xəbər verir ki, bunu rusiyalı ürək-damar cərrahı, tibb elmləri doktoru Roman Qoloşapov-Aksyonov “İzvestiya”ya açıqlamasında xəstəliyin inkişafını sürətləndirən əsas risk faktorları və pis vərdişlər barədə danışarkən bildirib.

Onun sözlərinə görə, ürəyin işemik xəstəliyinin inkişafını əhəmiyyətli dərəcədə sürətləndirən bir sıra əsas risk faktorları və pis vərdişlər var. Bunlara aşağıdakılar aiddir:

– siqaret çəkmək;

– tez-tez həddindən artıq yemək;

– şirin, unlu, yağlı, hisə verilmiş, ədviyyatlı, qızardılmış və duzlu qidaların həddindən artıq istehlakı;

– fiziki fəaliyyətin az olması;

– depressiya fonunda xroniki psixoemosional stres.

“Bu pis vərdişlər istər-istəməz ürəyin işemik xəstəliyinin inkişafına gətirib çıxaracaq”, – ekspert xəbərdarlıq edib.

Siqaret çəkmək xüsusilə təhlükəlidir, çünki o qanın laxtalanmasını və damarlarda trombların yaranması riskini artırır. Həddindən artıq siqaret çəkənlər üçün, karboksihemoqlobinin – toxumalara oksigen tədarükünü pozan qanda hemoqlobin ilə karbonmonoksit birləşməsinin yüksək konsentrasiyası kritikdir.