Hindistan tarixinin ən böyük fırıldaqçılığı: Qaçaq milyarder Mehul Çoksi 7 il sonra ələ keçdi

Yeddi il əvvəl Hindistandan qaçan və 1,6 milyard dollardan çox məbləğdə dələduzluqda şübhəli bilinən milyarder Mehul Çoksi Belçikada saxlanılıb.

presstvaz-ın verdiyi məlumata görə, bu barədə NDTV telekanalı məlumat verib.

Mehul Çoksi və onun qardaşı oğlu Nirav Modi, Pəncab Milli Bankının əməkdaşları ilə sözləşərək bankın aktivlərindən pulu mənimsədikləri müəyyən edildikdən sonra Hindistanın Mərkəzi Təhqiqat Bürosu tərəfindən axtarışa verilib.

Hindistan tarixində ən böyük fırıldaqçılıq barədə 2017-ci ilin sonunda məlum olub.

2018-ci ilin yanvarında Çoksi yaxın qohumları ilə birlikdə Hindistandan qaçıb. Onun harada olduğu məlum deyildi. O, “Interpol” tərəfindən axtarılırdı.

Ədliyyə Nazirliyi Çoksinin həbs edildiyini təsdiqləyib. Hindistan Belçikadan şübhəlinin ekstradisiyasını xahiş edib.

İş adamının vəkili Vicay Aqarval iddia edir ki, müştərisinin hüquqları, əgər o Hindistana ekstradisiya edilərsə, ciddi şəkildə pozulacaq. Mətbuat konfransı zamanı o bildirib ki, saxlanılan şəxsin müdafiəsi ekstradisiyaya iki əsas səbəbdən etiraz edəcək: işin siyasi xarakteri, həmçinin Çoksinin səhhəti və Hindistanda müalicəsi ilə bağlı narahatlıqlar.