Səmada qalmaqal: Sərnişin yeməyə görə dava saldı, təyyarə hava limanına geri qayıtdı

ABŞ-nin Nyu-York şəhərində Con F.Kennedi hava limanından Milana uçan “American Airlines” aviaşirkətinə məxsus təyyarədə qalmaqal baş verib.

Sərnişinlərdən biri yemək səbəbindən dava salıb və təyyarə uçuş etdiyi hava limanına qayıtmaq məcburiyyətində qalıb.

presstvaz-ın xəbər verir ki, bu barədə “New York Post” nəşri məlumat verib.

Məlumata görə, hadisə Atlantik Okeanı üzərində, təyyarə artıq bir neçə saat havada olduğu zaman baş verib.

Bildirilib ki, 40 yaşlı kişi sərnişinin qeyri-adekvat davranışına səbəb menyuda arzuladığı yeməyin olmaması olub. Narazı sərnişin stüardessaların üzərinə qışqırıb və körpə uşaqla təcili çıxış qapısının yanında otura bilməyəcəyini deyib. O, daha sonra stüardessalara hücum çəkib və pilotların kabinəsinə soxulmağa çalışıb, bununla da vəziyyət son həddə çatıb.

Göyərtəsində təxminən 300 sərnişinin olduğu təyyarədə aqressiv kişini sakitləşdirmək üçün heç bir aviasiya marşalı olmayıb. Özlərini itirən uçuş bələdçiləri kömək üçün sərnişinlərə müraciət ediblər, aralarında polis və ya hərbçilərin olub-olmadığını soruşublar.

Pilot vəziyyətin ciddiliyini nəzərə alaraq təyyarəni uçuş etdiyi hava limanına qaytarmaq qərarına gəlib. Yerli vaxtla saat 3:30-da məcburi eniş edilib. Sərnişinlər gecəni hava limanında keçirməli olublar və ertəsi gün səhər saat 11-də Milana uça biliblər.

ABŞ Federal Mülki Aviasiya İdarəsi (FAA) artıq hadisə ilə bağlı araşdırmalara başlayıb.