Elmar Mirsalayev: “Hava şəraitindən zərər görənlərə 4 milyon manatdan çox ödəniş edilib”

“Artıq biz birinci rübü tamamlamışıq. Azərbaycan Mərkəzi Bankı tərəfindən Yanvar-Fevral ayları üçün icmal açıqlanıb. Bu rəqəmlərdən sığorta sektorunun yığımları 281 milyon manatdan bir az yüksəkdir”.

presstvaz xəbər verir ki, bu fikirləri Azərbaycan Sığortaçılar Assosiasiyasının icraçı direktoru Elmar Mirsalayev “ASAN radio”nun efirində səsləndirib.

Onun sözlərinə görə, keçən ilin eyni dövrü ilə müqayisədə 17% faizdən çox artım deməkdir:

“Son 5 il ərzində sığorta sektorunda dayanıqlı artım, inkişaf müşahidə olunur. Ödənişlərdə də artım müşahidə olunur. 108,6 milyon manatdan artıq ödəniş olunub. Bu da ötən illə müqayisədə çoxdur. Bu müddətdə sığorta ödənişləri isə 11,45 % artaraq, 108,6 milyon manata çatıb”.

E.Mirsalayev onu da vurğulayıb ki, yalnız bu ilin fevral və mart aylarında yağan güclü qar nəticəsində sığorta şirkətlərinə 5 mindən çox müraciət daxil olub. Bu müraciətlər üzrə ümumi sığorta ödənişlərinin məbləği 4 milyon manatı ötüb. Nəticədə, minlərlə ailə ciddi maddi itkilərdən sığortanın hesabına qorunub”.