Böyük Britaniyada məxfi hərbi sənədlər küçəyə səpələndi

İngiltərənin Nyukasl şəhərində küçələrin birinə səpələnmiş yüzlərlə səhifəlik məxfi hərbi sənədlər tapılıb.

presstvaz xəbər verir ki, bu barədə BBC məlumat yayıb.

Qeyd olunur ki, zibil torbasından tökülən kağız yığını yoldan keçən bir nəfərin diqqətini çəkib.

Böyük Britaniya Müdafiə Nazirliyi insidentin təcili qaydada araşdırıldığını bildirib. Aşkar edilmiş sənədlər idarənin nümayəndələrinə təhvil verilib.

Bəziləri 2024-cü ilin sonlarına aid olan sənədlərdə Böyük Britaniya hərbçilərinin adları, sənədlərinin nömrələri və əlaqə məlumatları, silahların verilməsi və iş növbələri qeyd olunub. Bəzi sənədlər “məxfi” yazısı ilə qeyd olunub.

Hökumət təsnifatına əsasən, bu cür məlumatlar dələduzların əlinə keçərsə, bu, London və onun müttəfiqləri üçün qısamüddətli, orta intensivlikli təhlükə yarada, bəzi hallarda isə hərbçilərin həyatını təhlükəyə ata bilər. Sənədlərdən biri “Arsenalın açarları və təhlükəsizlik sisteminin kodları” adlanır.

Məlumata görə, sənədlər Şimali Yorkşirdə yerləşən Böyük Britaniya quru qüvvələrinin ən böyük bazası olan Katterik qarnizonuna aid ola bilər.