Potensial təhlükəli “Böyük piramida” bu gün Yerin yaxınlığından keçəcək

2014-cü ildə kəşf edilmiş “TN17” asteroidi 100 ildən çox müddət ərzində ilk dəfə bu gün – martın 26-da Yerin yanından ən minimal məsafədə keçəcək. NASA onu ölçüsünə və planetimizə müntəzəm yaxınlığına görə “potensial təhlükəli” kimi təsnif etsə də, hələlik toqquşma təhlükəsi yoxdur.

presstvaz-ın məlumatına görə, bu barədə “Live Science” yazır.

Təxminən 165 metr ölçüsündə olan – Gizadakı “Böyük piramida”nın hündürlüyündən bir az böyük kosmik cisim Yerin yanından təxminən 5.1 milyon km məsafədə, saatda 77 000 km-dən çox sürətlə keçəcək. Bu, NASA-nın modellərinə görə 2200-ci ilə qədər proqnozlaşdırılan ən böyük yaxınlaşmadır.

Tədqiqatçılar asteroidi Kaliforniyada (ABŞ) güclü “Goldstone” Günəş Sistemi Radarı (GSSR) vasitəsilə öyrənməyi planlaşdırırlar ki, bu da obyektin orbiti, sürəti və forması haqqında məlumat əldə etməyə imkan verəcək.

Alimlərin hesablamalarına görə, belə bir asteroid Yerlə toqquşsaydı, bütöv bir şəhəri məhv edə bilərdi.