Kobaxidze: “Bir daha “müharibə partiyası” ilə “sülh partiyası” arasında aydın sərhəd çəkildi”

Gürcüstanın Baş naziri İrakli Kobaxidze ABŞ Prezidenti Donald Trampın Ukraynada sülh yaratmaq istəyini dəstəklədiyini bildirib.

presstvaz   xəbər verir ki, siyasətçi bu fikirlərini “Facebook” hesabında paylaşıb.

“Dünən bir daha “müharibə partiyası” ilə “sülh partiyası arasında” aydın sərhəd çəkildi. Mən burada təkcə (Donald) Tramp və (Volodimir) Zelenskinin polemikasını yox, ona verilən reaksiyaları da nəzərdə tuturam. Prezident Tramp və onun sülh təşəbbüsləri ard-arda tənqid olundu. Bunu edənlər isə qanlı müharibəyə yol verən və minlərlə ukraynalının həyatını qurban verən şəxslərdir”, – deyə Kobaxidze qeyd edib.

Gürcüstan hökumət başçısının sözlərinə görə, “qlobal müharibə partiyası” dərhal Trampa qarşı səfərbər olub.

O, Brüssel məmurları və ABŞ senatoru Cin Şahin başda olmaqla bir çox şəxsin buna qarşı çıxdığını vurğulayıb.

“Onlardan geri qalmayan Gürcüstanın radikal müxalifət liderləri isə cəmi bir ay əvvəl Trampın inaqurasiyasında arxa otaqlarda çəkdikləri “selfi”lərinə heyran idilər”, – deyə Kobaxidze əlavə edib.

Onun sözlərinə görə, müharibə tərəfdarları ilə sülh istəyən qüvvələr arasında mübarizə həlledici mərhələyə daxil olub.

“Ukraynadakı müharibə nə qədər tez bitsə, bir o qədər az insan həyatı itiriləcək, bölgədə sülh daha tez bərqərar olacaq”, – deyə Gürcüstanın baş naziri fikirlərini tamamlayıb.