Ermənistan KİV: “Ölkə futbolunu qalmaqallı ifşalar gözləyir”

“Erməni futbolunu qalmaqallı ifşalar gözləyir, xüsusən də mərc oyunları və bu bizneslə məşğul olan yerli klublardan biri ilə bağlı”.

presstvaz-ın xəbər verir ki, bu barədə Ermənistan KİV-də yazı dərc olunub.

“Bizə çatan məlumatlara görə, hüquq-mühafizə orqanları Ermənistan Futbol Federasiyasının maliyyə fəaliyyətinə maraq göstərməyə başlayıblar. Hüquq-mühafizə orqanlarının əməkdaşları əsasən də Ordu Mərkəzi İdman Klubuna, komandaya dəvət olunmuş və mahiyyət etibarilə, orduda xidmətdən azad edilmiş gənclərin seçilməsi məsələsinə maraq göstərə bilərlər. Həmçinin futbol federasiyasında saxlanmaların ola biləcəyi ilə bağlı məlumatlar da var”, – deyə yazıda bildirilib.

Eyni zamanda, qeyd edilib ki, Ermənistan Futbol Federasiyasının rəhbəri Armen Melikbekyanın “növbəti uğursuzluqlarından” biri də Ermənistan millisinə baş məşqçi təyin olunacağına dair vədinə əməl etməməsi olub. Ermənistan millisinin isə martda Millətlər Liqasının pley-off matçlarında Gürcüstan yığması ilə qarşılaşması gözlənilir.

Xatırladaq ki, 2024-cü il oktyabrın 13-də Ermənistan millisi evdə Şimali Makedoniyaya 0:2 hesabı ilə uduzub və C Liqasının dördüncü qrupunda birinci yeri tutmaq şansını praktiki olaraq itirib. Oyundan az sonra baş məşqçi Aleksandr Petrakovun istefaya getdiyi məlum olub.

Oyundan sonra FAF (First Armenian Front – Birinci Erməni Cəbhəsi) nümayəndələri Ermənistan Futbol Federasiyasının binası qarşısında toplaşaraq, onun rəhbəri ilə görüş tələb ediblər. Melikbekyan onların qarşısına çıxmadığı üçün fanatlar onu istefa verməyə çağırıblar. Bu tələbi Ermənistan Premyer Liqasının bir sıra klubları da dəstəkləyib.