Şuşa yolunun və Zabuxçay su anbarının tikintisi başa çatıb

Türkiyənin nüfuzlu “Cengiz İnşaat” şirkəti Azərbaycanın işğaldan azad edilmiş ərazilərində həyata keçirdiyi bir sıra mühüm layihələri uğurla başa çatdıraraq dövlətimizə təhvil verib.

Şuşa avtomobil yolu, Zəfər yolu və Zabuxçay bəndi kimi strateji əhəmiyyətli layihələr artıq istifadəyə hazırdır.

presstvaz-ın “Milliyet”ə istinadla verdiyi məlumata görə, bu barədə şirkətin layihə meneceri Ekrem Tütüncü bəyan edib.

Onun sözlərinə görə, Şuşa ilə Füzulini birləşdirən Şuşa yolunda “Cengiz İnşaat” Azərbaycan Avtomobil Yolları Dövlət Agentliyi ilə magistralın 5-ci hissəsinin tikintisini tamamlamaq üçün işləyərək 3 cüt tunel və 3 ikitərəfli aşırımlı viadukun tikintisini başa çatdırıb. Azad edilmiş ərazilərdə kənd təsərrüfatı rayonlarının su tələbatını ödəmək üçün Laçın rayonunda tikilən Zabuxçay bəndi də “Cengiz İnşaat” tərəfindən inşa edilib.

“Zəfər yolundan sonra Şuşa yolu ilə sürətli və təhlükəsiz marşrut təmin etdik. Üç tunel və üç viadukun olduğu bu geniş layihə ilə Azərbaycanda ilk tunel tikintisini biz həyata keçirdik. Qarabağ bölgəsində ilk bənd olan Zabuxçay su anbarını tikdiyimiz və bölgənin kənd təsərrüfatının inkişafı üçün mühüm layihəyə imza atdığımız üçün qürur duyuruq”, – deyə o bildirib.

Ekrem Tütüncü Azərbaycanda layihələr götürməyə və ölkənin inkişafına töhfə verməyə davam edəcəklərini vurğulayıb.