Sürücülərin nəzərinə: Ara məsafəsi və sürət rejimi ilə bağlı VACİB XƏBƏRDARLIQ

DYP: “Nəqliyyat vasitələrinin tormoz sisteminin effektivliyi fərqlidir, diqqətli olun!”

           Daxili İşlər Nazirliyinin Baş Dövlət Yol Polisi İdarəsindən (BDYPİ) presstvaz-a daxil olan məlumata görə, respublika əhəmiyyətli avtomobil yollarında aparılan müşahidələr bəzi sürücülərin kritik qayda pozuntularına yol verdiyini aşkar edib. Xüsusilə təhlükəsiz ara məsafəsinin saxlanılmaması və hərəkət hissəsində düzgün yerləşməmə halları qəza riskini kəskin artırır.

Təhlükəsiz ara məsafəsi necə seçilməlidir? Qanunvericiliyin tələbinə əsasən, sürücü elə bir məsafə seçməlidir ki, öndəki avtomobil qəfil dayandıqda toqquşmadan yayına bilsin. Baş Dövlət Yol Polisi İdarəsi sürücülərə bir neçə mühüm məqamı xatırladır:

• Texniki fərqlilik: Hər bir avtomobilin tormoz sisteminin effektivliyi və dayanma məsafəsi fərqlidir. Öz avtomobilinizin texniki imkanlarını düzgün qiymətləndirin.

• Mütənasiblik: Sürət artdıqca ara məsafəsi də mütənasib şəkildə artırılmalıdır.

• Yol şəraiti: Yağışlı, dumanlı və ya nahamar yollarda ara məsafəsi normadan daha çox saxlanılmalıdır.

Yüksək sürət reaksiyanı zəiflədir presstvaz xəbər verir ki, idarə tərəfindən sürət həddinin aşılmasının yolverilməzliyi xüsusi qeyd olunub. Yüksək sürət zamanı sürücünün təhlükəni vaxtında görüb reaksiya vermə imkanı minimuma enir ki, bu da ağır nəticəli faciələrə zəmin yaradır.

          “Əhəmiyyətsiz hesab edilən hər bir qayda pozuntusu sonda faciəvi nəticələrə gətirib çıxara bilər.”

BDYPİ bir daha bütün hərəkət iştirakçılarını sükan arxasında məsuliyyətli, diqqətli və intizamlı olmağa çağırır. Unutmayın, yol hərəkəti qaydalarına riayət etmək mənzil başına sağ-salamat çatmağın yeganə təminatıdır.

presstvaz   – Azərbaycanın etibarlı informasiya mənbəyi