35 milyon dollar: Epşteynin fondu kisənin ağzını açdı

Ceffri Epşteynin irs fondu və onun iki icraçısı Darren İndayk və Riçard Kan maliyyəçinin qurbanlarına 35 milyon dollar təzminat ödəməyə razılaşıblar.

presstvaz-ın xəbərinə görə, bu barədə “Bloomberg” agentliyi məlumat verib.

Bildirilir ki, Epşteynin yanında uzun illər ərzində vəkil və mühasib kimi çalışan İndayk və Kana qarşı 2024-cü ildə məhkəmə iddiası qaldırılıb. Onlar maliyyəçinin qurbanları qarşısında məsuliyyəti rədd edirlər, lakin nizamlanma şərtləri ilə razılaşıblar.

Epşteynin varisləri buna ona görə razılıq veriblər ki, 1995-ci ildən 2019-cu ildə ölümünə qədərki dövrdə maliyyəçi tərəfindən cinsi zorakılığa məruz qaldıqlarını iddia edən təxminən 40 qadının iddiaları üzrə vəziyyət birdəfəlik həll edilsin.

Zərərçəkənlərin aparıcı vəkili Siqrid Makkouli bəyan edib ki, razılaşma oktyabr ayında baş tutan danışıqların nəticəsi olub.

“Təklif olunan razılaşma əvvəl mövcud olan və gələcəkdə bərpa oluna biləcək istənilən iddialar da daxil olmaqla, mirasa və vəsiyyətnamənin birgə icraçılarına qarşı istənilən iddialardan və potensial iddialardan azad edir”, – deyə Siqrid Makkouli qeyd edib.

Pulların köçürülməsi üçün federal hakim nizamlanma planını təsdiqləməlidir.

Maliyyəçinin varisləri artıq 136 iddiaçıya 121 milyon dollar, daha sonra isə 59 qurbana daha 48 milyon dollar ödəyiblər.